Četrys nalela izmāra, vīnkuorša dizaina boltys gruomatenis ir Valentina Lukaševiča tetralogejis "Ceļš” pamatā.
"Es izreizis izsprīžu, ka nav kuo čakarētīs – juotaisa kūpuotī roksti uzreiz! Lai cylvākus naapgryutynuot,”
tai par sovim dzejis kruojumim "Kuozynda” (2005), "Vot taidi vot i batvini” (2006), "Bolti burti” (2011) i "Pādi navā svāti” (2021) soka pats autors.
Sovu ceļu latgaliskajā literaturā Lukaševičs izsuocs kūpā ar Oskaru Seikstu 1995. godā ar stuostu dzejā "Seppuku iz saulis vādara” i 1996. godā izdūtū romanu "Valerjana dzeive i redzīni”.
"Beja laiks, kod myus ar Seikstu navarēja izdzeit nu bibliotekys. Myusu meiluokuo biblioteka beja pi Rēzeknis kulturviesuris muzeja. Beja taida latgalīšu literaturys laseitova, kur trimdinīki atsyuteja tik daudz gruomotu i, ka pareizi atcerūs, tī beja Sprūga, vīna taida meitene, kas tū vadeja, i mes tī dzeivuojom. Mugursūmys nabeja. Es divuos kuleitēs nešu iz sātu i pa naktim laseju. Es vīnkuorši daudz laseju,” par ostoņdesmitūs godu beigu i deveņdesmitūs suokumu, kod tyka laseits vyss, atguodoj Valentins Lukaševičs.
"Tys beja apmāram tai, ka tu nedeļu nabeji dabuojs iudini i beidzūt tu īraugi, ka ir miļzeigs krans, prūds. I tū navar izdzert vysu.
I maņ ir taida sajiuta, ka tu vysu laiku beji tuksnesī, tu naasi dziers, pītryukst veļdzis, i tu īraugi prūdu, kū navar izsmeļt. I vēļ maņ beja ūtrys šoks – a kai tū vysu izlaseit, kai tū vysu paspēt.” Nu pīzeimu , kas tūlaik leidz 1996. godam tyka veiktys losūt cīši daudz latgalīšu literaturys, Valentins Lukasevičs naizslādz, ka varātu izdūt nuokūtnē kaidu gruomotu par latgalīšu literaturys viesturi. „Eistineibā maņ pateik muni jauneibys laika pīroksti. Cyta jiuta ir. Cyta sajiuta. Maņ pateik pyrmī īspaidi. Vot, kod tu cīši ilgi ar tekstu čakarejīs, tys jau ni tai ir. Es saprotu tū, ka maņ cīši svareigs ir pīfiksēt pyrmū īspaidu. [..] Maņ ir svareigi, kod es jū pyrmū reizi dzeivē radzu. Tod, kod es tū laseju, es napaslynkuoju, maņ vēļ tuos kladeitis ir – pyrmais īspaids losūt tī teiksim Zvīdru voi kū cytu. Tī pyrmī īspaidi ir feini.”
Vys tik Valentins Lukaševičs nav tikai dzejnīks i literaturzynuotnīks, jis ir ari kaisleigs nūvodpietnīks i ar juos stuostim kūpā var brist leluokus i mozuokus Latgolys ceļus, stuosteit vysai Latvejai par cytaidi latvyskū.
Podkastā aba raidīrokstā "Puslopys” Valentins Lukaševičs gastēja i ar sovu dzeju i volūdys izjiutu pasadaleja pyrma kaida laika. Tī ar jū par latgalīšu literaturu, volūdu i dzeivi kai taidu apsarunuoja latgalīšu volūdys entuziaste, marketinga specialiste Edeite Husare i muzikis, viesturnīks i raidejumu vadeituojs Arņs Slobožanins, kurais kai īrosts jau "Puslopuos” ar uzaicynuotuo autora vuordim radejs ari kaidai jaunai dzīsmei skici. Itūreiz gon nu Valentina Lukaševiča gruomotys "aizajimts” nūsaukums i kūpā ar Verneru Martinovu skice puortopuse ari taišni taida nūsaukuma dzīsmē "Muni pādi nava svāti”.
