Kolnasāta

“Bosom kuojom” pa valna pādim, dūbem i pakolnim

Kolnasāta

VIESTURE: Pretruneigi vārtātais latgalīts Juoņs Zvīdra

Popularuokais Latvejis komikis — latgalīts Juoņs Skuteļs

Komikis Juoņs Skuteļs: ir palics gryušuok izdūmuot itam laikam atbiļsteigus jūkus

Pievērs uzmanību – raksts publicēts pirms 3 gadiem.

Latvejis vīns nu popularuokūs komiku Juoņs Skuteļs ir latgalīts i īt nu Viļānu nūvoda Dekšuoru. I niu, kasdīnā dzeivojūt Reigā, latgalīšu volūdā saīmūt runuot cīši ratai, leidza ar tū dasaīt pīdūmuot pi kotra ūtruo vuorda. Lai ari sabīdreibā Juoni vaira atpazeist kai komiki, kasdīnā jis nūsadorboj ari ar daudzom cytom nūpītnom lītom i dorbim, tymā storpā ar „Kino un mēs” nominants bolvai „Lielais Kristaps”, bet cyta storpā ir puorlīcynuots, ka mums vysim kasdīnā vajadzātu prast vaira pasasmīt, tūstorp ari pošim par sevi.

 „Kaidu breiteņu mums ari dīzgon labi tys saguoja. Bet niu maņ redzīs, ka itys ‘Covid’ laiks ir atsits myus atpakaļ par puora godu. Asam otkon palykuši depresivuoki, eipaši labi mes tū varim redzēt teatrī... Es vēļ cīši labi atguodoju, kas tei ir par sajiutu, kod skateituoji zālē reagej i kū dora. Niu, kod jī četrisymti vīteigā zālē ir symts, ir taids klusums. Smejās ari tai pīticeigai, kluseņom pi seve, kab vīns ūtra natraucātu,” nūvāruojs komikis Juoņs Skuteļs. „Maņ vysod ir bejs skaidrys, ka kompanejā leidz pīcdesmit cylvāku, mes asam dīzgon kūtri. Kod zalā ir kaidi pīci symti cylvāku, tī jau tuos lītys dīzgon labi īt iz prīšku. Tī tod tu vairs nazini, kurais smejās, kurais nā. Trūksnis vysu puorjem. Tagad ar vysu tū, ka juosiež par gobolu vīnam nu ūtra, kai ba varātu justīs drupeit drūsuok, jo nivīna nav blokus, bet ir tuos atstarpis, i tu izreiz redzi, kurš i kur smejās, kurš nā. Tei taida magiska paruodeiba. Es smejūs, kod maņ ir smīkleigi, kod nav – kluseju.”

Juoņs ari soka, ka niu ir palics gryušuok izdūmuot itam laikam atbiļsteigus jūkus. Cylvāki i ari kūpejais fons ir byutyski mainejīs.

„Lela daļa nu tuo, par kū cylvāki parosti smītūs, temys, par kurom byutu interesanti i smīkleigi pasarunuot, pieški vaira nav aktualys.

Koč voi nu tuos pošys izruodis „Linda Vista” – stuosts par četrdesmitgadnīku krizi, ka tu izašķir i kū niu dareit, dzeive beidzās ci nasabeidz. Tagad es tai najiutu, ka itei ir cīši aktuala problema. Koč gon itei problema jau nav pagaisuse, nikas nav mainejīs. Apleicejais fons sasamaina – kas tev ir svareigi i kas nav.”

Nasaverūt iz tū, ka Juoņa Skuteļa vuords daudzim asociej ar jūkim, jis pats uzsver, ka juo kasdīnā ir daudzi ari nūpīnu dorbu i lītu. „Jau pīminātuo izruode „Linda Vista”, tī ir puora epizodis, kur nu smīkleiguo gola nikuo nav. Par vosoru mes ar Matīsu Kažu fiļmejom, jis taisa jaunu kinu „Neona pavasaris”. Tys ir jaunīšu gobols, kur es golvonuos lūmys meitinei spieļoju tāvu, kurš ir izaškeirs, vīns pats ar divejim bārnim. Piļneigi nav muns stuosts!!! Tī nikuo smīkleiga nav. Tei nūpītneiba jau izreiz nanūzeimoj dramu i depreseju. Tī ir kū pajimt.”

Juoņs atzeist – humors atsaškier i atsaškier tys atkareibā nu tuo, kur tu dzeivoj i kaida ir tova kasdīna. „Golvonais jau drūši viņ ir tys, kai tu izstuosti sovu stuostomū, cik uotri cylvāks var nūīt pi tuo, par kū tu runuoji, ka tys jam ari ir svareigi. Par pīmāru, tu vari runuot par sastrāgumim iz ceļa Līpuojā ci Rēzeknē, bet tymā breidī jim golvā ir piļneigi cyta aina nikai reidzinīkam. Treis minutys nav tys pats, kas desmit minutys iz kotra tylta. Pryncypā cylvāki saprūt, bet emocejis jim tys eisti naizraisa.”

Na vysod skateituojim ruodīs smīkleigi i saprūtami Juoņa jūki, bet improvizacejis teatra breineiba vaicojama taišni tymā, ka tev vysu laiku juorauga byut iz vīna viļņa ar skateituojim zālē.

„Skateituoji ir kolosali režisori. Vysa zāle kai vīns vasals kūpums, i tys ir tys, kas pamatā ari nūteik improvizacejis teatrī – zāle režisej.

Jī tev pasoka, kai tev īt, ir voi nav smīkleigi, pa lānu, pa uotru, var voi navar saprast... Tei ir taida kolosala sajiuta, ka tu navari vīnkuorši stuosteit sovu stuostomū, bet tev vysu laiku ir juoatrūn taida atgrīzeniskuo saite ar zāli, lai saprostu, kur tu esi... ka tu sagloboj tū sajiutu, ka tovs monologs ir ari dialogs, tod tev ir ari adekvata reakceja iz tū, ka kaidam tys var ari napatikt.”

Verūtīs iz improvizacejis teatri i ‘stand-up’ komedejis žanru, Juoņs redz, ka Latvejā tam nav tuoluokys vierzeibys muokslinīku atteisteibai karjerā. Ar tū ir saleidzynūši gryuši nūpeļneit. „Par pīmāru, ka naudā puorvierst, tik cik akters var nūpeļneit ar kinu, kab savuokt itū pošu sumu ar ‘stand-up’ komedeju ir cīši juostruodoj.”

Koč ari Juoņs vysā breivai runoj latgaliski i ari vysur vysod izsviers, ka ir latgalīts, latgaliski jam runuot saīt cīši reši, pādējūs padsmit godus kai pats soka – reizis pīcys godā, aiz tuo niu saīt pīdumuot pi daudzu vuordu. Sovpus latgaliskumu sevī vysvaira jiut, taišni asūt Latgolā. „Vysam tam, ar kū es nūsadorboju, ir mozs sakars ar latgaliskumu i Latgolu. Ari nu komedejis vīdūkļa es taipat vaira verūs iz rītumim, britim, amerikanim. Kas tī nūteik. Maņ Latgolā ir reši, bet pateikami puorsteigumi. Ir sovā ziņā forši īraudzeit vītu, kuru tu labi zini, piec kaidu desmit godu. Ir daudzi puorsteigumu.”

Atbiļdūt iz vaicuojumu par tū, kur jis smeļas īdviesmi i idejis sovim stuostim, Juoņs soka kūduleigi: „Tī golvonais ir turēt acs vaļā i reizi pa reizei vysu koč kur pīraksteit, jo tū ideju ir stipri vairuok nikai vajag.”

Kļūda rakstā?

Iezīmējiet tekstu un spiediet Ctrl+Enter, lai nosūtītu labojamo teksta fragmentu redaktoram!

Iezīmējiet tekstu un spiediet uz Ziņot par kļūdu pogas, lai nosūtītu labojamo teksta fragmentu redaktoram!

Saistītie raksti

Vairāk

Svarīgākais šobrīd

Vairāk

Interesanti