"Cylvākim tymā breidī ap 2004. godu acimradzūt tys latgaliskais iz skotuves beja kaut kas eksotisks, i vyspuor suocēs tei tuoda plašuoka pīsaviersšona Latgolai,"
par sadarbeibu ar Nacionalū teātri soka pošā pīrubežā Dansku cīmā dzimušo dramaturge Anita Ločmele. Jei daudzus godus struoduojuse kai latvīšu volūdys i literaturys školuotuoja Baļtinovys vydsškolā, niu struodoj vītejā muzejā, bet ituo vysa storpā jei ir ari latgalīšu seriala "Ontans i Anne" radeituoja i kūpumā vaira nakai 20 lugu autore. 2008. godā izguojs ari Danskovītis lugu kruojums "Lugas" gruomotys formatā, kur īkļautys pīcys nu "Ontans i Anne" lugu daļom i cytys lugys, bet 2015. godā gruomotā "Ontans i Anne. Komedejas" izdūtys ostonis "Ontans i Anne" dalis. "Annei niemu par pamatu – principā munu mammu Annu. Ar juos rakstura "abarotu". Prūtams, nūtykumi jau ir izdūmuoti, bet īškā ir daudzi reali fakti. Bet tū sižetu es izdūmovu.
Maņ gribejuos, lai lauki dzeivoj, lai kot div veči saīt kūpā.
A Ontans tys ir daleji muna vacuotāva raksturs, muna tāva raksturs – tuods lānīs," soka Anita.
Iz vaicuojumu, ar kū atsaškir "lauku dramaturgeja" nu "klasiskuos dramaturgejis" Anita soka: "Nu cīši vīnkuorši – maņ ir juopīsamāroj kaut kuodā veidā. Mes braucam iz izruodi, vīnam aktieram pīzvona telefons nu muoju: "Mīluo, brauc ātruok atpakaļ, gūvs nasuos!" Myusim tymūs dažūs kilometrūs juonūorganizej, voi nu kas īs paleigā, voi nu jai ir juoteik atpakaļ, juopanam cyts akters. Nu vysa kuo ir. Tys ir pīmāruotais teatris laukim."
Danskovīte par sovu rodūšū veikumu sajāmuse vairuokas bolvys, taipoš 2011. godā jai daškierta ari AKKA/LAA Autortīseibu bezgaleibys bolva.
Latgalīšu literaturys raidīroksts "Puslopys" ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. "Puslopys" aicynoj īsaklauseit ari latgaliski pīraksteitūs dorbūs voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.
Ar latgalīšu literaturys autorim sasarunoj muzikis, viesturnīks Arņs Slobožanins i projektu vadeituoja, latgalīšu volūdys popularizātuoja Edeite Husare.
