Pusdiena

Pusdiena 18.03.2024

Puslopys

#puslopys RAIBĪS/ Oskars Orlovs i juo saisteiba ar japuoņu anime

#puslopys ILZE SPERGA - dūt vuordu sovai īškejai babai

#puslopys: Ilze Sperga – dūt vuordu sovai īškejai babai

Pievērs uzmanību – raksts publicēts pirms 2 gadiem.

Ilze Sperga ir myusdīnu latgalīšu literaturys veterans. Literaturys procesūs pīsadola nu vysu pušu i latgalīšu literaturu atbolsta, kai viņ var – roksta dorbus poša, roksta projektus cytim, organizej, paleidz kai redaktors.  Bet, kod stuosta par Ilzi, tod juorunoj ni tikai par stuostu kruojumu „Dzeiveiba”, par dīnrokstu Naktineica.lv, byušonu aktivai socialajūs teiklūs i byušonu tai, kurymā īsaklausa, taipat par volūdu i dzeivi kai taidu ar tuos vysim izaicynuojumim. Par tū vysu i vēļ vaira kūpā ar Ilzi vīnā nu raidīroksta „Puslopys” serejom.

Viļānīte, kurei dzymuse Varakļuonūs, bet niu dzeivoj Ulbrokā – tei ir Ilze Sperga. Jei sovūs dorbūs lītys sauc eistajuos smaržuos, garšuos i izskotūs, aiz tuo izsaucūt daizaidu emoceju viertini, gon leidzpuordzeivojumu, gon smīklus, gon osorys, gon ari, kai poša Ilze soka, kaids piec stuostu kruojuma „Dzeiveiba” laseišonys sacejs, ka šņaba dziers.

Ilze Sperga
Ilze Sperga

Ari sovūs dīnrokstūs Ilze atkluoj daudz personeigu lītu, bet par tū jai ir sovs uzskots: „Tys ir  izlikts iz papeira, i tymā šaļtī tei vairs naasu es, tys ir teksts. Par tū, kas maņ ir byutiskys, es nikod naraksteišu, tys, kas maņ ir pa eistam. Ja maņ koč kas ruodīs šaubeigs – es izdziešu piec kaida laika. Deļtuo maņ ilgu laiku beja puordūmys –

varbyut es nimoz nagrybu gruomotu papeira formatā, partū ka maņ grybātūs gruomotu, kur es piec kaida laika varu lobuot.

[..] Maņ patyktu gruomota, kura mainuos, bet iz papeira tys eisti nasaīt, blogā var pamaineit piec kaida laika.”

Ilze rakstejuse jau nu bierneibys, bet pusleidz regulari nu kaida 90. goda, kod beja ari vaļstī krasys puormainis i ruodejuos, ka ir juopīroksta tū, kas nūteik.

Ari par raksteišonu latgaliski Ilzei ir sovs vīdūklis. „Tys nabeja pašmierkeigai... I tymā pošā blogā ir gona tekstu ari latvyski. Nav tai, ka es tagad raksteišu tikai latgaliski. Tviterī tymā pošā es ar cylvākim sasarokstu taidā volūdā, kaidā maņ jī roksta.[..] Tys nav tai, ka es grybu koč kū pīruodeit voi ceineitīs, voi kū. Vīnkuorši tys tai organiski saīt. Var jau byut, ka vēļ tymā šaļtī, 2008.–2009. godā, nabeja tai, ka cylvāki publiski daudz raksteja par ikdīnišķom lītom latgaliski. Varbyut, ka es koč kurā breidī raudzeju koč kai popularizēt kaidys latgalīšu grupys voi nūtykumus, vīnkuorši par jim pīrokstūt tim, kas nasekoj. Lai jī īrauga. Tys beja tys laiks, kod ari Lakuga.lv vēļ eisti nabeja.”

Latgalīšu literaturys raidīroksts „Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. „Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu. Ar latgalīšu literaturys autorim sasarunoj muzikis, viesturnīks Arņs Slobožanins i marketinga specialiste, latgalīšu volūdys popularizātuoja Edeite Husare.

Koč ari Ilzei Spergai ir daudz dažaidu stuostu, kur jei dūd vuordu sovai īškejai babai, itymā raidīrokstā Arņs jaunys dzīsmis skicei ir izavieliejs kaidys ryndys nu autoris bārnu dzejis.

Lai skatītu šo resursu, mums ir nepieciešama jūsu piekrišana sīkdatnēm.
Kļūda rakstā?

Iezīmējiet tekstu un spiediet Ctrl+Enter, lai nosūtītu labojamo teksta fragmentu redaktoram!

Iezīmējiet tekstu un spiediet uz Ziņot par kļūdu pogas, lai nosūtītu labojamo teksta fragmentu redaktoram!

Saistītie raksti

Vairāk

Svarīgākais šobrīd

Vairāk

Interesanti