„Piļneigi kotrā vaļstī ir kaida mozuo volūda, kurai varbyut naīt tik labi kai grybātūs.”
Pādejūs puora mienešus latgalīšu volūdys aktiviste i žurnaliste Vineta Vilcāne, kura sovulaik bejuse ari raidejuma „Kolnasāta” producente, pavadeja uorpus Latgolys, kur jei gon īsapazyna ar cytom mozuoklītuotom volūdom, gon stuosteja par latgalīšu volūdu pasauļa kontekstā.
„Pādejūs mienešūs asu bejuse cīši lela latgalīšu volūdys aktiviste, bet uorpus Latvejis, maņ beja īspieja pavadeit vairuokus mienešus Niderlandē i ari vīnu mienesi ASV, kur es stuosteju par latgalīšu volūdu i ari raudzeju īsapazeit ar cytom volūdom. Maņ beja īspieja tū dareit, jo es dorbojūs vīnā starptautyskā projektā, kur es puorstuovu bīdreibu „Latgolys Studentu centrs”. Tuos ir taidys pādejuos lītys, kū es doru,” stuosta Vineta.
Vineta stuosta, ka projekts ir vārsts iz mozuoklītuotūs volūdu atteisteibu i pasauļa pīredzis dabuošonu itymā vaicuojumā.
„Dūma ir taida, ka sasatikt vysaidom lingvistiskuom, saceisim, minoritatem, jūs pietnīkim, gon ari kūpīnu aktivistim, daleitīs pīredzē i ari kotrai kūpīnai struoduot iz vysaidu materialu, kas ļautu atteisteit kūpīnys volūdu, itymā gadejumā, latgalīšu volūdu.”
Vineta pīzeist, ka kotrai vaļstij ir kaida minoritašu ci mozuoklītuota volūda ar sovu viesturyskū pīredzi i izaicynojumim. Taipoš tom vysom ir gon atškireigys, gon ari kūpeigys problemys i izaicynuojumi.
„Prūtams, vīns nu izaicynojumu ir volūda školuos i izgleiteibys sistemā i vyspuor volūdys, rokstu volūdys vuiceišonuos.… Interese par volūdu vaira rūnās, kod tu palic pīaugušuoks, tu suoc apsazynuot montuojumu, bet nu ūtrys pusis byutu jūodūd tim bārnim jau koč kaidys pamatzynuošonys rokstu volūdā, lai tod, kod jī palīk jau pīaugušuoki, jim jau ir koč kaida baza i jī jau atsacer, jā, tī beja tai i tai, i jau saslādz kūpā, jo es vīnkuorši radzu, ari piec tūs cylvāku kas maņ ir apliek, cīši daudzi roksta latgaliski, bet jī roksta ar klaidom i vysdreižuok jī ari naīsavuiceis pareizi raksteit. Vuords piedeņuos, kū nūzeimej pareizi... Svareiguok ir tū pareizū rokstu volūdu lītuot, kod teik radeitys taidys palīkūšys vierteibys kai, pīmāram, gruomota, kur tu navari piec tam vaira izlobuot klaidys, voi tys ir muzykys pasuokuma plakats, nazynu, muzykys diskys, jo cylvāks parostais, latgalīts voi nalatgalīts , kas varbyut vaira interesejās par volūdu, jis pajem rūkuos tū gruomotu, disku i jis jau apriori pījem, ka tī vyss ir pareizi. I tī, kas roda tuos palīkūšuos vierteibys, jim juoapsazynoj i juorauga dareit maksimali vysu, lai vys tik tī tyktu īvāruotys tuos pareizraksteibys normys.”
Vuiceitīs latgalīšu volūdu ir taipoš kai vuiceitīs sevkuru cytu pasauļa mozuok ci vairuok lītuotu volūdu, tai tys ari juoiztver. Te Vineta tur, ka pošim latgalīšim byutu drupeit juomaina attīksme pret tim cylvākim, kuri gryb lītuot latgalīšu volūdu i vuiceitīs tū. Sovpus volūdys lītuotuojim tys juodora ar cīnu i vysmoz, rodūt palīkūšys vierteibys, juorauga īvāruot ari pareizraksteibys nūsacejumi.
„Nu vīnys pusis mes kai latgalīši gribim, lai volūdu aizviņ vaira lītoj, bet nu ūtrys pusis, ka kaids tū dora mes asam dīzgon kritiski, i es pat saceitu, ka latgalīši ir dīzgon leli volūdys policisti.”
