Diktatu raksteit grybātuojim itūgod teik pīduovuota vareiba diktata tekstu raksteit ari tīšsaistē i tū īsnēgt klaidu puorbaudeišonai. Tū varēs izdareit ite: https://ej.uz/LTGdiktats.
Vaļsts volūdys lykumā saceits, ka latgalīšu rokstu volūda ir viesturiskys latvīšu volūdys paveids i sūpluok latvīšu literarajai volūdai ir latvīšu volūdys ūtra rokstu tradiceja. Taišni izsvarūt latvīšu volūdys daudzveideibu, kotrys grybātuojs sevkurā vītā pasaulī 15. oktobrī teik aicynuots paraudzeit, kai tys ir – raksteit latgaliski. Koč ari kūpejais latgalīšu volūdys lītuotuoju skaits sasamazynoj, vys tik arviņ vaira teik pīgrīzta viereiba latgalīšu volūdys raksteit prasšonai – jau ūtrū godu nūteik pilotprojekts, kurā latgalīšu rokstu volūda teik vuiceita konkretuos Latgolys školuos, taipat itūgod bīdreiba “LgSC” reikoj bezmoksys tīšsaistis apvuiceibys interesentim, kurī gryb vuiceitīs raksteit latgaliski. Svareigs fakts myusdīnu latgalīšu rokstu volūdai – tikū septembra golā paguoja 15 godu nu 2007. goda, kod Vaļsts volūdys centrā ir apstyprynuoti myusdīnu latgalīšu rokstu volūdys pareizraksteibys nūsacejumi.
Sastais diktats latgalīšu rokstu volūdā skanēs sastdīnis, 15. oktobra, vokorā 18.20 stuņdēs latgaliskajā raidejumā “Kolnasāta” Latvejis Radejis 1 eterā, kai ari video formatā byus nūsaverams Sabīdryskūs medeju portalā LSM.lv i latgalīšu kulturys ziņu portalā lakuga.lv, taipat Latvejis Radejis Latgolys studejis i portala lakuga.lv socialūs teiklu profilūs. Diktata teksta skaiteišona itūgod uzticāta teatra trupys “KVADRIFRONS” akteram Juoņam Krūņam, kura dzymtys saknis ir Latgolā, bet diktata tekstam izvālāts fragments nu rakstnīka i literaturzynuotnīka Valentina Lukaševiča esejis. Diktatat teksts, kas sagataveits, īvārojūt 2007. godā apstyprynuotūs nūsacejumus, piec tuo nūslāguma puorbaudei byus daīmams portalūs lakuga.lv i LSM.lv. Diktatā pīļaunama divskaņa “uo” apzeimuošona ari ar “ō”.
Svātdiņ, 16. oktobrī, 16.00 diktatu ir vareiba pīraksteit ari kluotīnē Lūznovys muižā.
